ميزات د.منيو

كل زبون بيمسح الرمز بكاميرا موبايلو وبيفتح المنيو فوراً، بلا تطبيق وبلا تحميل. بلوغو مطعمك وألوانو، وبيفتح بسرعة حتى عالنت الضعيف.

غيّرت سعر؟ خلص صنف؟ من لوحة التحكم على موبايلك بتعدّل، والمنيو عند كل الزباين بيتحدث بنفس اللحظة. بلا طباعة، وبلا شطب.

بتكتب السعر مرة وحدة، وأنت بتختار كيف بيبين للزبون: بالليرة الجديدة، أو بالقديمة، أو بالتنتين جنب بعض.

المنيو بلغتين، والزبون بيبدّل بكبسة. والاتجاه بيتظبط لحالو: من اليمين للعربي ومن اليسار للإنكليزي.

سبع تخطيطات، ستة أشكال للبطاقات، وألوان بتمشي مع هويتك. وبتشوف النتيجة قبل ما تحفظ.

جنب كل صنف: السعرات مع دقائق المشي يلي بتحرقها، والملّاحة جنب الوجبات عالية الملح، والكافيين بالمشروبات، ومسببات الحساسية. كلها بتنحسب لحالها.

قسم الفطور بيبين الصبح بس، وعرض «الساعة السعيدة» بينزل السعر بوقتو ويرجع لحالو. وطبق اليوم بيطلع أول شي بالمنيو.

علّم أصنافك بشارات بتلفت النظر، واقترح على الزبون شو بيمشي مع طلبو. هيك الفاتورة بتكبر بدون ما حدا يضغط.

صور عروضك بتتقلّب لحالها فوق المنيو، وكل بانر بيوصّل الزبون للقسم يلي بدك ياه.

كم زبون فتح المنيو، بأي وقت، ومن وين، وشو أكتر صنف بيتشاف وبينطلب. أرقام بتساعدك تقرر.

كل طاولة إلها QR. الزبون بيختار وبيبعت، والطلب بيوصل للمطبخ ولشاشة الكاشير فوراً، وبيتجمّع على فاتورة الطاولة لحد الدفع.

الزبون بيكبس «نادي الجرسون» أو «بدي الحساب»، والجرسون بيوصلو تنبيه فيه رقم الطاولة. خلص التلويح بالإيد.

استلام من المطعم، أو توصيل مع أجرة وحد أدنى لكل منطقة، أو من السيارة: الزبون بيكبس «وصلت» وأنت بتطلّعلو الطلب.

المشاوي بتشوف المشاوي، والعصائر بتشوف العصائر. كل قسم إلو شاشة وطابعة، والتذكرة بتنطبع لحالها لحظة قبول الطلب. والطلب ما بيصير جاهز إلا لما يخلص كل قسم حصتو.

نقطة بيع كاملة عالتابلت أو الكمبيوتر: بتكبّس الأصناف، بتاخد المصاري، وبتنطبع الفاتورة. وحتى لو قطع النت، البيع بيكمل.

58 ملم، 80 ملم، A4، أو أي عرض بتكتبو. شعارك، عنوانك، عبارة آخر الفاتورة، ورمز يتابع فيه الزبون طلبو. وبتشوف المعاينة قبل ما تطبع.

حدد رسومك وضرائبك كنسبة أو مبلغ ثابت، واختر الطاولات أو التوصيل أو الاستلام أو السيارة. بتظهر للزبون قبل الطلب وعلى الفاتورة، والفواتير السابقة بتحتفظ بقيمها.

وردية بتنفتح بمبلغ، والدفع كاش أو شام كاش أو سيريتل كاش أو MTN كاش أو تحويل أو بطاقة. وآخر الوردية بتعدّ الدرج والنظام بيقلك إذا في فرق.

لكل صنف وصفة، وكل ما جهز طلب المواد بتنقص من المخزن لحالها. وبتعرف تكلفة كل طبق وكم عم يربّحك.

رتّب طاولاتك متل صالتك الحقيقية، وشوف كل طاولة شو عم يصير فيها بلون: فاضية، مشغولة، طالبة الحساب، أو محجوزة.

بتعدّل المنيو بالفرع الرئيسي وبتبعتو لكل الفروع بكبسة. وبتشوف مبيعات كل فرع جنب التاني.

لكل منطقة أجرتها وحدّها الأدنى، والزبون بيختار منطقتو. ولكل سائق طريقة حساب، والنظام بيحسبلك كم إلو.

حساب للمطبخ، وحساب للجرسون، وحساب للكاشير. كل واحد بيشوف الشاشات يلي بيحتاجها، والمطبخ ما بيشوف الأسعار.

كل سبت الصبح بيوصلك ملخص: الزيارات والطلبات وأكتر الأطباق مبيعاً والتقييمات، مع نصيحة.

بيمسح الرمز عن الفاتورة وبيشوف طلبو خطوة بخطوة، مع الوقت المتوقع من طلبات مطعمك الحقيقية. ولحتى يجهز، بيتسلّى بلعبة. ولما يجهز، الموبايل بيرن.

كل طلب مدفوع بياخد عليه الزبون ختم أو نقاط على رقم موبايلو، ولما يكمّل بياخد مكافأتو. والكاشير بيشوف بطاقتو بس يكتب الرقم.

بعد الطلب، الزبون بيقيّم بالنجوم وبيكتب ملاحظتو، والتقييم بيوصل لإلك بس. بتعرف شو لازم يتصلّح قبل ما ينكتب برّا.